Նորարարական տեխնոլոգիաների դարաշրջանում անհնար է պատկերացնել ժամանակակից մարդու կյանքն առանց թվային սարքերի՝ համակարգիչների, սմարթֆոնների, պլանշետների և այլնի, և իհարկե, ինտերնետի հասանելիությամբ։ Թվային տեխնոլոգիաները պարզեցնում են տարբեր ոլորտների աշխատանքը՝ դարձնելով առօրյան ավելի հարմարավետ։ Ինտերնետը համակարգչային տեխնիկայի աշխատանքային լավ ընկերն է, որը միշտ օգնության կգա ճիշտ պահին, բայց նաև՝ թշնամին, որը շատ խնդիրներ կբերի ձեր համակարգչին կամ բջջային հեռախոսին: Փորձենք միասին պարզել, թե ինչպես կարելի է պաշտպանվել համակարգչային վիրուսներից և հաքերային ծրագրերից:
Համակարգչային վիրուսներով վարակվելու ճանապարհները
Վարակման վտանգն առկա է ամենուր՝ ինտերնետ կայքեր, տեղական ցանցեր, էլփոստի ֆայլեր, կայքերի հղումներ, առցանց խաղեր, USB կրիչներ, կոմպակտ սկավառակներ և այլն:
Ինչպե՞ս է դա տեղի ունենում:
Ամենատարածված ճանապարհներից մեկը անհայտ ուղարկողի կողմից էլփոստ, հղում կամ ֆայլ բացելն է: Օրինակ՝ դուք ներբեռնում եք ձեզ հետաքրքրող ֆայլը, և մինչ այն բացվում կամ աշխատում է, վիրուս պարունակող ծրագրերը ներթափանցում են ձեր համակարգիչ՝ պատճառելով լուրջ վնաս: Մեկ այլ ճանապարհ էլ USB կրիչներ կամ այլ արտաքին սարքեր օգտագործելն է: Այս դեպքում, հենց որ կրիչը միացվում է ձեր համակարգչին, վիրուսը ավտոմատ կերպով սկսում է իր չարագործ աշխատանքը:
Վարակման հետևանքները
Իրականում մեզանից յուրաքանչյուրը կարող է դառնալ կիբերհանցագործների պոտենցիալ զոհ: Ի վերջո, բավական է հրապարակել ձեր էլփոստի հասցեն ցանկացած հարթակում, և դուք վտանգի տակ եք: Հետևանքները կարող են լինել բավականին տհաճ, և երբեմն՝ անդառնալի։ Եթե վիրուսային ծրագրերը արտահոսել են ձեր տան համակարգիչ, ապա դուք իրականում վտանգի տակ եք դնում միայն ձեր սարքը և անձնական տվյալները: Պատկերացրե՛ք, թե ինչ կլինի, եթե վիրուսը ներթափանցի ձեր աշխատանքային էլտրոնային հասցե. այս դեպքում ընկերությունը ոչ միայն կրում է մեծ չափի գումարային վնասներ, այլև վտանգվում է ներքին սերվերների աշխատանքը։ Պետք է տեղյակ լինեք, որ միշտ չէ, որ հնարավոր է վերականգնել կորցրած տեղեկատվությունը: Այսպիսով, միլիոն անգամ մտածեք՝ արժե՞ արդյոք ձեր հետաքրքրասիրության պատճառով նման անախորժություններ ունենալ:
Պաշտպանվելու եղանակները
Եթե ուզում եք պաշտպանել ձեր համակարգիչը վիրուսներից, հաքերային հարձակումներից, պետք է որոշ կանխարգելիչ միջոցներ ձեռնարկեք.
- Հակավիրուսային պաշտպանություն. կախված ֆինանսական հնարավորություններից՝ ընտրե՛ք ձեր գրպանին հարմար հակավիրուսային ծրագիր: Առավելագույն պաշտպանություն ապահովելու համար ավելի լավ է տեղադրել վճարովի հակավիրուս: Եթե ոչ, ապա կարող եք սահմանափակվել անվճար տարբերակով, որն ապահովում է հիմնական պաշտպանությունը:
- Համակարգի թարմացում՝ անկախ հակավիրուսի տեսակից։ Օրինակ՝ Windows-ի կանոնավոր թարմացումները բացահայտում են օպերացիոն համակարգի թերությունները, որոնց միջոցով թափանցում են վիրուսներ և տրոյաններ:
- Զտիչների տեղադրում. Firewall-ը, որը զտում է ցանցային փաթեթները, օգնում է վերահսկել տեղադրված ծրագրերի մուտքը ինտերնետ: Նման ֆիլտրը կարող է կանխել տրոյական հարձակումը:
- USB կրիչների ստուգումը կօգնի ձեզ խուսափել այլ կրիչից անհայտ ծրագրերի փոխանցումից: Եթե ցանկանում եք արխիվացված ֆայլերը փոխանցել ձեր համակարգչին, ապա պետք է ստուգեք դրանք անմիջապես unzipping-ից հետո, իսկ մեծածավալ ծրագրի տեղադրման դեպքում դուք պետք է ոչ միայն սկանավորեք բոլոր ֆայլերը, այլև տեղադրումից հետո կատարեք վիրուսների վերահսկման ստուգում:
- Օգտահաշիվ. անվտանգությունն ու գաղտնիությունն ապահովելու համար նպատակահարմար է ստեղծել փակ օգտատիրոջ հաշիվ և աշխատել դրանում։ Խորհուրդ է տրվում սահմանափակել մուտքը տեղական ադմինիստրատորի հաշիվ:
Եզրակացություն
Ելնելով վերը նշվածից՝ կարող ենք եզրակացություն անել. վիրուսներից և հաքերային ծրագրերից պաշտպանվելու համար դուք պետք է.
- համոզվեք, որ տեղադրված է հակավիրուսային ծրագիր
- պարբերաբար թարմացնեք բոլոր ծրագրերը և օպերացիոն համակարգերը
- անջատեք ձեր ինտերնետ կապը, եթե դրա կարիքը չունեք.
- չափազանց զգույշ լինեք կասկածելի ֆայլեր ներբեռնելիս և վեբ հղումների վրա սեղմելիս.
- չպատասխանեք էլ.նամակներին, որոնք խնդրում են հեռախոսահամարներ և հաշվեհամարներ, գաղտնաբառեր և այլ անձնական տեղեկություններ:
Եթե ամեն դեպքում վիրուսը կներթափանցի ձեր համակարգիչ՝ անհապաղ դիմեք մասնագիտների, ովքեր գրագետ կիրականացնեն անհրաժեշտ աշխատանքներ:
