Պրինտերից օգտվող ցանկացած անձ առնվազն մեկ անգամ բախվել է խնդրին, երբ սարքը հրաժարվում է տպել։ Պատճառները կարող են տարբեր լինել՝ սկսած հեշտ կարգավորվող պարզ սխալներից մինչև ավելի լուրջ տեխնիկական անսարքություններ: Այս հոդվածում կդիտարկենք հիմնական քայլերը, որոնք կօգնեն հասկանալ անսարքության պատճառը և վերացնել խնդիրը:
1. Ստուգել կապը
Նախ՝ համոզվեք, որ տպիչը ճիշտ է միացված համակարգչին կամ ցանցին: Ստուգեք մալուխները և միացումները: Եթե ձեր տպիչը միացված է USB-ի միջոցով՝ փորձեք օգտագործել այլ պորտ կամ մալուխ: Անլար տպիչների դեպքում համոզվեք, որ դրանք միացված են նույն Wi-Fi ցանցին, ինչ և ձեր համակարգիչը:
2. Ստուգել տպիչի կարգավիճակը
Նայեք տպիչի էկրանին կամ ցուցիչներին: Եթե առկա է անճշտություն ցույց տվող ազդանշան, ապա օգտվողի ուղեցույցում գտեք, թե ինչ է նշանակում սխալի տվալ կոդը: Համոզվեք, որ տպիչում բավարար քանակի թուղթ և թանաք կա, և որ թուղթ չի խցանվել։
3. Մաքրել տպման հերթը
Երբեմն տպագրության ուղարկված փաստաթղթերը կարող են «խցանված» մնալ տպման հերթում: Windows-ի համար բացեք «Սարքեր և տպիչներ» բաժինը, գտեք ձեր տպիչը, սեղմեք դրա վրա մկնիկի աջ կոճակով և ընտրեք «Դիտել տպման հերթը»: Ջնջեք հերթում առկա բոլոր առաջադրանքները և նորից փորձեք տպել փաստաթուղթը: Mac-ում բացեք «Համակարգի կարգավորումներ»-ը, ընտրեք «Տպիչներ և սկաներներ», գտեք ձեր տպիչը, սեղմեք «Բացել տպման հերթը» և ջնջեք բոլոր առաջադրանքները:
4. Վերագործարկել սարքերը
Վերագործարկեք և՛ տպիչը, և՛ համակարգիչը: Այս քայլը հաճախ օգնում է վերացնել ժամանակավոր խափանումները: Անջատեք տպիչ սարքը և հոսանքի սնուցումը, սպասեք մի քանի րոպե և նորից միացրեք։ Նույն կերպ վերագործարկեք համակարգիչը, որպեսզի բոլոր միացումները և ծառայությունները թարմացվեն։
5. Թարմացնել դրայվերները
Հին կամ վնասված դրայվերները կարող են խնդիր առաջացնել տպելու ժամանակ: Ստուգե՛ք, արդյո՞ք ձեր տպիչի դրայվերի թարմացումները հասանելի են արտադրողի կայքում։ Ներբեռնեք և տեղադրեք դրայվերների վերջինը տարբերակները, ապա փորձեք նորից տպել փաստաթուղթը։
6․ Տպիչի կարգավորումները
Համոզվեք, որ ձեր տպիչը աշխատում է լռելյայն տարբերակով։ Windows- դեպքում անցեք «Սարքեր և տպիչներ» բաժին, պահեք մկնիկը ձեր տպիչի վրա, սեղմեք մկնիկի աջ կոճակը և ընտրեք «Սահմանել որպես լռելյայն»: Mac-ի դեպքում մտեք «Համակարգի կարգավորումներ», ընտրեք «Տպիչներ և սկաներներ», գտեք ձեր տպիչը և սահմանեք այն որպես լռելյայն։
7. Ծրագրային ապահովում և համատեղելիություն
Երբեմն տպագրության հետ կապված խնդիրները կարող են պայմանավորված լինել ծրագրային ապահովման անհամատեղելիությամբ։ Համոզվեք, ձեր տպիչն աշխատում է այն հավելվածի հետ, որից օգտվում եք։
Փորձեք այլ ծրագրից կամ այլ ձևաչափի փաստաթուղթ տպել՝ ծրագրային անհամապատասխանությունը բացառելու համար։
8. Ստուգել վիրուսների և վտանգավոր ծրագրերի առկայությունը
Վիրուսները և վնասակար ծրագրերը կարող են խափանել տպիչի աշխատանքը: Ստուգեք ձեր համակարգիչը հակավիրուսային ծրագրի միջոցով և ջնջեք բոլոր հայտնաբերված սպառնալիքները։
9․ Դիմել մասնագետի
Եթե վերը նշված քայլերը արդյունք չեն տալիս, հնարավոր է խնդիրը տպիչ սարքի մեջ է և նորոգման կարիք կա։ Դիմեք պրինտերների սպասարկման կենտրոն կամ հրավիրեք մասնագետի՝ ախտորոշման և անսարքությունը վերացնելու համար։
Եզրակացություն
Պրինտերի աշխատանքի հետ կապված խնդիրները կարող են պայմանավորված լինել մի շարք գործոններով՝ սկսած փոքր սխալներից մինչև բարդ տեխնիկական անսարքություններ։
Հետևելով այս քայլերին՝ դուք կարող եք ախտորոշել և վերացնել տպիչի աշխատանքի ամենատարածված սխալների մեծ մասը։ Եթե խնդիրը չի լուծվում, մի՛ խուսափեք դիմել մասնագետների օգնությանը։
